彈弓指！能屈不能伸？

彈弓指（Trigger finger）學名叫手指屈肌腱狹窄性肌腱鞘炎（Stenosing Flexor Tenosynovitis）。故名思義症狀係手指屈曲難以伸直。一般常見病發於瞓醒後，手指屈曲無法伸直，而手掌同手指嘅連接位置，即手板心方向會出現輕微腫脹，甚至可觸摸到一粒如紅豆般大嘅結。通常患處係慣用手嘅其中一隻手指，拇指、無名指及中指較為常見。而患者初期可自行慢慢鬆開，嚴重期甚至需要另一隻手幫手拉，而且過程中會感覺到條肌腱好似撠住咗，大力拉會感覺到甚至聽到＂啪＂一聲先可以拉返直，仲會好痛添！後果最嚴重則係直頭拉唔返直！猜包剪揼最怕人彈弓手！朝早瞓醒最怕彈弓指！

初期：伸直手指間唔中會撠住，痛楚較輕
中期：痛楚明顯，伸直手指明顯會撠，但可依靠個人單手力量緩慢鬆開
後期：痛楚更為明顯，無法主動伸直手指，特別喺肌腱撠住時最痛！需依靠另一隻手協助才能伸直
最嚴重：手指撠實屈埋無法伸直

彈弓指最常出現於喺 50 – 60 歲成年人，而女性比較多。糖尿病或腕管綜合症患者亦較大機會患上，而糖尿病患者則較大機會幾隻手指同時出現彈弓指！經常重複手部動作嘅職業，例如餐飲業員工不斷包外賣；搬運工人搬運重物；裝修工人用力揸實工具發力或操作會震動工具例如：壓路機、電鑽嘅人都會較易患上彈弓指。

手踭同前臂負責屈起手指嘅肌肉起點，肌腱連接到手指頭，因此肌腱特別長，而且有好多筋膜包住條肌腱。當手指活動時肌腱會喺筋膜下嘅隧道滑動﹐重複磨擦會令兩者增厚，肌腱上會好似起繭咁脹起，空間收窄令滑動更困難，經過成晚瞓覺無郁動，就會變得更僵硬，甚至朝早起身手指撠住伸唔直！

彈弓指治療唔一定要打針或做手術，非手術方式會用同儀器進行治療，包括：

1. 超聲波同激光：刺激患處減少發炎腫脹，增加血液循環，加速軟組織修復。
2. 衝擊波：由於力量更強，除咗能消炎消腫，將患處痴實嘅軟組織打散，而且能有效刺激身體再次修復。
3. 針刺治療：可以放鬆繃緊僵硬嘅肌肉，加速血液循環。
4. 患者亦可以考慮夜晚瞓覺時可戴上手指托，保持手指伸直避免長時間屈曲令肌肉繃緊，適當嘅伸展運動都可以放鬆手指屈肌減低肌腱嘅壓力。

若以上治療效果唔理想，西醫會打類固醇落患處和打針，如果無效則需考慮開刀切開筋膜。但文獻指出無論係非手術定手術治療，情況越嚴重，治療成功嘅機會就越低，所以出現症狀最好都係及早診治啦！